მე დავიბადე სიყვარულისთვის
და მარტოობის დამყვა უღელი;
მე დავიბადე სიხარულისთვის,
და უტყუარი დამყვა წუხილი;
მე დავიბადე...
სიცოცხლეს ჩემსას -
ჰქვია იმედი...
ჰქვია დარდები...
მე დავიბადე გამოსაცდელად,
ნამდვილად მერე დავიბადები.
მერე... როდესაც აპრილის თვეში
შემოასკდებათ ტოტებს კვირტები,
ასფალტს გავხეთქავ ბალახის ღერო
და სულ ვიქნები...
              და სულ ვიქნები...
მე დავიბადე?! -
დროთა აცდენამ
სივრცე მომიჭრა ჰორიზონტებით,
დროს ვუძლებ, სივრცეს კალამზე ვიხვევ,
ვუახლოვდები, რასაც ვშორდები.
მე დავიბადე დეკემბრის თვეში
ზამთრის ინტიმი ბინადრობს ჩემში.