ნეტავ როგორი იყო ის ქალი
რომელმაც შესცოდა პირველმა
და ფოთლით დაიფარა მერე სიშიშვლე?
ნეტავ როგორი იყო ის კაცი
რომელმაც მოკლა პირველმა
და სისხლით თვალები გაუცივდა?
ნეტავ როგორი იყო ის მონა,
რომელმაც თავი დახარა პირველმა,
რომ ბორკილები დაედო ქედზე?
ნეტავ როგორი იყო,რომელმაც
გამოქვაბულთან იმღერა პირველმა
და კლდეს მზის გულზე ჩამოჰკიდა
თავისი ჩრდილი?

ეჰ,რამდენი დრო გასულა,
ტყუპისცალივით იმეორებს თავისთავს:
ფოთოლი-ფოთოლს;
ღამე-ღამეს;
ბგერა-ბგერას;
ფერი-ფერს;
წვიმა-წვიმას
და...
ნეტავ როგორი იქნებიან ისინი,
რომლებიც შესძლებენ
ბუნებაში წაშალონ
ყველაზე მძაფრი რეფლექსი
__სიცოცხლე?!