საქართველო კლდეში არის ნაკვეთი,
მეწამული მისი მიწის ფერია,
უფლის კვართის გულში ჩამხუტებელი
საქართველო გერგეთი და გრემია.

საქართველო ყინწვისია ცისფერი,
ფრესკებია, ხატებია, ჯვრებია.
ვაზის კულტის ოდითგანვე მტვირთველი
კახეთური, იმერული ზვრებია.

საქართველო გამზრდელია დავითის,
თამარის და სხვა წმინდანთა მშობელი.
სისხლიანი, იარებად დაჭრილი
მაინც არის მტერთა დამამხობელი.

საქართველო ცეცხლოვანი ცეკვაა,
უძველესი ენა არის ქართული,
სვეტიცხოვლის გუმბათამდე ასული
გალობაა, სიმღერაა ხალხური.

საქართველო ტაძარია უფლისა,
მონასტრებით გული გადაფენია,
ნატანჯი და მრავალ ბრძოლანანახი,
მწვანეს ნაცვლად მეწამულის ფერია.