ვისაც სურს გაახალგაზრდავება, გთხოვთ, თანმიმდევრობით შეასრულოთ შემდეგი ინსტრუქცია:
        1. გაემგზავრეთ ბაგებში, წყნეთის გზატკეცილზე;
        2. გზის პირზე მდგომი ახლად აშენებული, თერთმეტ სართულიანი საცხოვრებელი კორპუსის მიდამოებში მოძებნეთ ასკილის ბუჩქი, შემდეგ კი წითელი და ყვითელი ტყემლის ხეები (გაახალგაზრდავების კარიბჭე მათ შორის მდებარეობს, თვალით უხილავია და ამიტომ ჭირს მისი ზუსტი ადგილმდებარეობის დადგენა);
        3. პირველად მოკრიფეთ წითელი ტყემალი, რაც მუჭში დაგეტევათ. ჭამის დროს ცოტა მტვრის გემო უნდა შეიგრძნოთ (არავითარ შემთხვევაში არ გარეცხოთ, მიუხედავად იმისა, რომ ახლო-მახლო წყალი საერთოდ არ არის);
        4. შემდეგ მოკრიფეთ ყვითელი ტყემალი. სასურველია რომ რამდენიმე ცალი ხელში შემოგეჭყლიტოთ (აუცილებელია პროცესის დაჩქარებისათვის);
        5. დაგემოვნების დროს შეიგრძნობთ სასიამოვნო სურნელს (ხელები გაწებილი გაქვთ);
        6. სწორედ ამ დროს გაიხსნება თქვენს წინაშე გაახალგაზრდავების კარიბჭე და თქვენ ზუსტად იმ ასაკში აღმოჩნდებით, როცა ბავშვობაში, სკოლიდან მომავალი, მეზობლის ხილს იპარავდით;
        7. ფეხით გაისეირნეთ ავტობუსის გაჩერებისკენ. დაელოდეთ 61 მარშრუტს და მკვირცხლად ადით კიბეზე;
        8. ავტობუსით მგზავრობის დროს თუ ვინმე შეეცადა ადგილის დათმობას, ისეთი სახით შეხედეთ, რომ საერთოდ დაეკარგოს უფროსი ადამიანისთვის ადგილის დათმობის სურვილი;
        9. თავისუფლების მოედანზე ჩამოდით ავტობუსიდან. არავითარ შემთხვევაში ფანტანთან არ დაიბანოთ ხელები, თორემ ისევ რეალურ ასაკში აღმოჩნდებით.
        გისურვებთ წარმატებას!
        კარგად ბრანდებოდეთ!