ადამიანი ეტყობა ყველაფერს წინასწარ გრძნობს და მოსალოდნელი ხიფათი მის ქცევებში პოულობს ასახვას:
იმ საბედისწერო დილას ადრიანად გამეღვიძა და როგორც კი თვალი გავახილე, სიმღერა წამოვიწყე.
_რა გაბღავლებს? _მუჯლუგუნი წამკრა ცოლმა.
_კი არ ვბღავი, ვმღერი, _შუბლი შევიკარი.
_ “დილით იმღერებ საღამოს იტირებო~, _ყვავით დამჩხავლა ქალმა ძველი სიბრძნე.

სამსახურში რომ მივედი, წერილი დამხვდა. შემოსავლების სამსახური მატყობინებდა, რომ გადაეწყვიტათ ჩემი ბიზნესის რევიზია და უფლება მქონდა ამერჩია ~ალტერნატიული საგადასახადო შემოწმება~.
შევშფოთდი და აღვშფოთდი.
შევშფოთდი _ ფული უნდა დამაწერონ და ავღშფოთდი _ რაღა მე უნდა დამაწერონ?!

~ნუთუ, სამშობლოს ისე უჭირს რომ ჩემს პატარა ბიზნესს მოადგა გასაწეწად?!~ _ გავივლე გულში და ამ საქმეში გამოცდილ ახლობლებს დავურეკე.

_გაგწეწავენ!

_გაგწეწავენ!

_ალტერნატიული აირჩიე, ნაკლებად გაგწეწავს.

ყველაფერი გამიგია ალტერნატიული, სექსიც კი, მაგრამ საგადასახადო შემოწმება თუ იყო ალტერნატიული, აქამდე არ ვიცოდი. ახლობელთა რჩევით ამ უკანასკნელზე შევჩერდი და შემოსავლების სამსახურში წერილი ვაფრინე:

~ა ლ ტ ე რ ნ ა ტ ი უ ლ ი    მ ი ნ დ ა ! ~

კარგი კანონი მიუღიათ, ალბათ, რევოლუციის კიდევ ერთი მონაპოვარი:
შენს რევიზორს თვითონ ირჩევ.

ისტორიკოსი ვარ და ამ კანონმა ალტერნატიულის ფუძემდებლის ხალიფა ომარის რეფორმები გამახსენა:
დიდი და მოწყალე ალაჰის მოადგილის ხალიფა ომარის ბრძანებით სიკვდილმისჯილს გარკვეული საფასურის გადახდის შემდეგ თვითონ შეეძლო ჯალათის არჩევა.
საქმეში ჩაუხედავი იტყვის, რა მნიშვნელობა აქვს, ვინ ჩამოგახრჩობსო, მაგრამ მთლად ასე არ არის. ხომ აქვს მნიშვნელობა, თოკი გასანთლულია თუ ხამი? გასანთლულს რომ გასაპნული სჯობს, ალბათ ამაშიც დამერწმუნებით.

სამი დღის შემდეგ მეწვია, მავანისგან რეკომენდირებული, ~ჩ ე მ ი  ა ლ ტ ე  რ ნ ა ტ ი უ ლ ი~.

ოფისის კარზე მორიდებით დააკაკუნა, ჯერ თავი შემოყო და მერეღა შემოვიდა.
მაშინვე თვალში მომხვდა მისი  მაღლა აწეული თავი, აბზეკილი ცხვირი, პედანტის მანერები და ჰალსტუხი, რომელიც პატარა ღიპს ქვემოთ მიუყვებოდა და ლამის შარვლის უბეს სწვდებოდა.

~ახლა კი დაგერხა, ნოდარ!~ _ვუთხარი საკუთარ თავს, როცა მისი ტიპაჟი ბოლომდე აღვიქვი და ხელი გავუწოდე. მხნედ ჩამომართვა, მომიჭირა და ჩემმა უხეშმა მარჯვენამ იგრძნო მისი ხელის სიფაფუკეში დამალული სუსტი ძვლები და კიდევ უფრო დავფრთხი.
ამ ტიპის ადამიანებთან მრავალგზის მქონია ურთიერთობა. მე მათ ვერ აღვწერ,  მაგრამ თუ ის თქვენი ზემდგომია, შემიძლია გირჩიოთ, როგორ მოექცეთ და ეს რჩევები თეზისებადაც კი ჩამოგიყალიბოთ:

წესი N1 _თქვენ მასზე მაღალი არ ხართ _ უბრალოდ, გრძელი ხართ.

წესი N2 _ის მდიდარია, თქვენ_მათხოვარი, მაგრამ ნუ ელით მოწყალებას.

წესი N3_ის ჭკვიანია, ითამაშეთ ბრიყვი.

წესი N4 _იყავით ბრიყვი, მაგრამ ნუ იქნებით გულახდილი

წესი N5 _მისი მადლიერი უნდა იყოთ და ეს ხშირად  აღნიშნეთ.

წესი N6 __ის არის დევი, ნუ ითამაშებთ ნაცარქექიას, რადგან ნაცარქექიაც ის არის.
.
წესი N7 _ იცინეთ, როცა ის იცინის, მაგრამ თქვენმა სიცილმა მის ხმას არ უნდა გადააჭარბოს.

წესი N8 _ როცა ის შუბლს შეიკრავს, თქვენ უნდა დაიბნეთ და თუ სახეზე სასოწარკვეთა გამოგესახებათ_მთლად უკეთესი.

წესი N9 _ის რჩევებს არ იძლევა, მაგრამ მოსწონს, როცა რჩევას სთხოვთ.

წესი N10 _ თუ შეგიძლიათ, არ იქონიოთ ურთიერთობა ასეთ კაცთან.

ამხელა ცოდნა-გამოცდილებით აღჭურვილი შევხვდი ჩემს შემმოწმებელს.
სამწუხაროდ თუ საბედნიეროდ, დავარღვიე წესი N10 და მასთან ურთიერთობის ხელშეკრულებას ხელი მოვაწერე.

როცა ხელშეკრულების ტექსტს ვეცნობოდი,  რომ იცოდეთ, როგორი მობუზული იჯდა... პატარა კაცი კიდევ უფრო დაპატარავდა, მაგრამ როგორც კი ჩემგან მომსახურების ათასხუთასი ლარი და ხელშეკრულებაზე ხელმოწერა მიიღო, ერთბაშად გაიზარდა, შუბლი შეიკრა, ფეხზე ადგა, ამაყად გაიარ-გამოიარა და მითხრა:
_შემოწმება ხვალიდან დავიწყოთ, ამ მაგიდაზე წლების მიხედვით დამილაგეთ საბუთები,  ცალცალკე დეკლარაციები, უწყისები და სალაროს წიგნები, ახლა კი წავიდეთ და ჩვენი ხელშეკრულება შემოსავლების სამსახურში დავარეგისტრიროთ.
_წავიდეთ, _წავიბუტბუტე და გამახსენდა წესი N2.
~ვაიმე, ამან თუ ჩემი ჯიპი ნახა.~
_ მანქანით ხართ? _მკითხა, როცა კიბეები ჩავათავეთ.
_ არა, _ ვიცრუე მე, _ახლავე ტაქსს გავაჩერებ.
ჩემს ჯიპს გვერდით ჩავუარე და ~ტაქსი~ _ენერგიულად ვიყვირე.
_ რამხელა ხმა გქონია, _თქვა და გაიცინა. გავითვალისწინე წესი N7 და მის სიცილს მეც ავყევი, დავასწარი, ტაქსის წინა კარი გამოვხსენი და ~სავარძელზე დავაბრძანე~.

გზაში ჯიბიდან სიგარეტი ~ელემი~ ამოიღო და მოუკიდა. მეც მომინდა მოწევა, მაგრამ წესმა N2-მა არ მომცა უფლება ჩემი რევიზორისთვის ~კენტი~ მეჩვენებინა და თავი შევიკავე.

მეორე დღეს სათანადოდ მოვემზადე: ერთი პიჯაკი მაქვს, მოდური, მაგრამ ზურგზე გახუნებული. ის ჩავიცვი, ჩემს ბიძაშვილს ჯიპი თავის ჯაბახანა ~ფორდ სიერაში~ დროებით გადავუცვალე, უბნის მაღაზიაში, რომლის მუდმივი კლიენტიც ვარ, უფილტრო სიგარეტი ~პრიმა~ შევიძინე და გამყიდველი გავაოცე.
_ ნოდარ, არ გრცხვენია, პოსლეზე მოგცემ! _ გამომეკიდა ქალი ~კენტით~ ხელში.

სამსახურში მივედი თუ არა, ~ჩემი ალტერნატიულიც~ მოვიდა. მორჩილი, ხუთოსანი ბავშვივით დავულაგე საბუთები, რამდენიმე ბრიყვული შეკითხვაც მივეცი(წესი N3), შემდეგ დემონსტრაციულად ამოვაძრე ჩემი ჯიბეჩაგლეჯილი პიჯაკიდან პრიმა(წესი N2)  და შევთავაზე.
_არა, არა, _ დამცინავად გადმომხედა და ზუსტი, პედანტური მოძრაობით ~ელემი~ ამოიღო და მე დათრგუნული, შეშინებული თვალებით შევხედე(წესი N8), ბრიყული სახე მივიღე(წესი N4) და ვთქვი:
_ კიდევ კარგი თქვენ მამოწმებთ და სხვა არა, თორემ სხვა ძალიან გამწეწავდა(წესი N5).
_ შენ რა იცი, რომ მე არ გაგწეწავ? _ახითხითდა და მეც ავყევი(წესი N7).
_ თქვენ ამას რატომ იზამთ, თქვენ ეს არ გჭირდებათ(წესი N6).

ერთი თვის განმავლობაში სწავლობდა ~ჩემი ალტერნატიული~ ჩემს საბუთებს და ბოლოს, როცა შემოწმების აქტი გამაცნო  და მიბრძანა ხელი მომეწერა და ვნახე, რომ მაინცდამაინც არ გამწეწა, მივხვდი, რომ შეცდომა არ დამიშვია, როცა არ შევასრულე წესი N10.

~გაუმარჯოს ალაჰის მოადგილეს, დიდსა და მოწყალე ხალიფა ომარს და მისი საქმის დღევანდელ გამგრძელებლებს! გაუმარჯოს ყველაფერს ალტერნატიულს!~ _ვიყვირე ხმამაღლა, ერთი თვის დაგროვილი, წესებითა და ციფრებით დამტვერილი ჰაერი ერთბაშად ამოვისუნთქე და სახეზე ბედნიერი ღიმილი შემახმა.

სამართლიანი იყო ალაჰის თანაშემწე ხალიფა ომარი.
მის დროს თურმე ერთი ალტერნატიული ჯალათი ცხოვრობდა, სახელად ალ მარუხი, კაცი თავისი საქმის უზადო მცოდნე და ხელოვანი. თურმე ისე ოსტატურად ჩამოახრჩობდა დამნაშავეს, რომ საიქიოს მიჰყვებოდა  მიცვალებულს სახეზე ღიმილი და როცა თოკზე ეკიდა ბედნიერი სიკვდილმისჯილი, ცრემლად იღვრებოდა უბედური ჯალათი. ოცდაათ დინარს იღებდა ამ საქმეში თურმე ალ მარუხი. იმასაც ამბობენ, მისი ხელოვნების სანახავად ხალხი ნიშაბურიდან და თვით ჰამადანიდანაც კი ჩამოდიოდაო.