მე და შენ ერთ კაცს ვნახულობთ სიზმარში - ქმარს და მამას.
მე და შენ გვერდიგვერდ გვძინავს და ეს ერთი კაცი ერთდროულად შენთანაც მოდის და ჩემთანაც.
შენს სიზმარში მამას შენთვის თოჯინა მოაქვს,
ლოყაზე გკოცნის,
თოკზე დადის აკრობატივით,
შენი გულისთვის ჯადოქრებს ებრძვის,
დახუჭობანას გეთამაშება და მერე ქრება.
ჩემ სიზმარში კი მონატრებული ქმარი ხან ყელში მკოცნის,
ხან ძუძუზე,
ხან კი სხვა პლანეტაზე მიმაქროლებს, რომ სიყვარულში უცხო არავინ შეგვეცილოს.
ხან კი შორიდან მითვალთვალებს, მის მაგივრად, სხვას ხომ არ ველი.
ხან სარკის წინ დამაყენებს და ერთად ვუყურებთ ჩემ შიშველ სხეულს.
ხან უცებ ქრება, მერე ჩნდება და ყველას თვალწინ ფეხებს მილოკავს.
მე და შენ ერთ კაცს ვნახულობთ სიზმარში - ქმარს და მამას.
მე და შენ გვერდიგვერდ გვძინავს და ერთდროულად ეს ერთი კაცი შენთანაც მოდის და ჩემთანაც.
დილაობით როცა ვიღვიძებთ, შენ გულახდილად მიყვები სიზმარს, როგორ მოვიდა მამა და მოგიტანა თოჯინები, აკრობატივით თოკზე იარა და მეკითხები:
- შენ არ ნახულობ მამას სიზმარში?
და მე გპასუხობ:
- კი, როგორ არა. წუხელ ვნახე, ვითომ "ბიგ ბენის" ისრებს ეკიდებოდა და აბზრიალებდა, დროს აჩქარებდა, ჩემი გოგოები მალე ვნახოო...
მოკლედ გატყუებ... დიდების სიზმრებს რას გაუგებს პატარა გოგო.