ვარ მომღერალი კლდესავით უხმო
და ვარ მელექსე დაჭრილ ოცნებით
ღამით ბახუსის მსახურთ მოვუხმობ
და შავ ღვინოში ჩავიხოცებით

დავუბრუნდები დარდის კელიას
ბედნიერების არ მაქვს გროშებიც
დავკრიფავ ღამით თეთრ კამელიას
და წვიმის ნამით გავითოშები

ცა ნაომარი გამოფენს მედლებს
ქარი გადაშლის ბროლის ბილინგვას
გრძნეულ ქალივით გავყვები კედლებს
კედლებს რომლებიც არსად მიმიყვანს