ნაწარმოები შეიცავს უცენზურო ფრაზებს

თუ თქვენ გინდათ ნახოთ მხოლოდ ეს ნაწარმოები, დააჭირეთ აქ

  ფუჰ, შენ კაცი არ იყო! _ ზიზღით მიაძახა ავტობუსში ასულ მამას...
  იმ დღეს პეპომ თავისი პირველი გამარჯვება იზეიმა ტოტალიზატორთან. მოგებული ოცდახუთი ლარის გამოყენების უამრავი შესაძლო ვერსიიდან, ბურთის ყიდვაზე შეჯერდა ბოლოს.
  პეპოს მამა, რამისა, ლოთი იყო და ამქვეყნად ყველაზე დიდ მკრეხელობად ბავშვის და ფულის ურთიერთობას მიიჩნევდა...
  ავტობუსამდე სდია ბიჭმა, დამიბრუნე  ტოტალიზატორის ბილეთიო, მაგრამ ამაოდ დაშვრა. რამისა ღამით უზომოდ მთვრალი დაბრუნდა სახლში.  პეპო სახლში არ მოსულა.
_ პეპო, ქურთების კოვზი გვაჩვენე რა! _ ხშირად ელაზღანდარავებოდნენ უბნის უსაქმურები.
_ აი! _ მარჯვენა ხელის პეშვს დაანახვებდა პასუხად.
_ ქურთების ჩანგალი როგორ არის, ბიჭო?!
_ აი! _ მარჯვენა ხელის თითებს ფარჩხავდა, ცერის გამოკლებით.
_ პეპო, მიდი რა, ტარაკანას გააჯავრე, კაცურად.
_ როგორ გავაჯავრო, მე თვითონ ვარ ტარაკანა?! _ კეთილად ეღიმებოდა პეპოს.
  ბოლოს მაინც იყიდა ბურთი. ოღონდ ეგ იყო, რომ ქურდ-ბაცაცობა არასდროს მოუშლია დღიდან იმ დღისა.
  რამისა რომ დაიჭირეს, ამით პეპოს ცხოვრებაში არაფერი შეცვლილა, გარდა იმისა, რომ ქურდობა ოფიციალურ მოვალეობად ექცა. სასამართლოზე არ მისულა _ სახლში პატარა ძმას შიოდა და ფული უნდა ეშოვნა. შვიდი წელი მიუსჯიათო, უბნის ბიჭებისგან გაიგო მერე. ფუ, ეგ კაცი არ იყოს! _ ჩაილაპარაკა ზიზღით და გადავარდნილ ბურთს დაედევნა.
  ოჯახში მშვენივრად ხვდებოდნენ, როგორ ყიდულობდა პურს პეპო, მაგრამ დედას არასდროს გაუპროტესტებია ეს. ის კიარადა, ,,მამაშენივით უსაქმურს“ უწოდებდა, როცა ბიჭი ხელცარიელი ბრუნდებოდა. თავად მალთაშორისი თიაქარი ტანჯავდა და შრომა არ შეეძლო, დას  კი პეპო უკრძალავდა.
  თანდათანობით ქურთის პოპულარობამ საგრძნობლად იმატა. უკვე აღარც კადრულობდა ბიჭ-ბუჭებთან ფეხბურთის თამაშს. კაი ბიჭი ვარო, პირველად რომ თქვა, ეგონა ზეცა ჩამოემხობოდა, მაგრამ არაფერი მომხდარა მსგავსი. ვინ გახასიათებს, პეპუშ? _ მაინც ჩაეძია ერთი. ესა და ესაო _ საყოველთაოდ ცნობილი ავტორიტეტი დაასახელა...
  დაბალი იყო, მაგრამ გრძელი ნაბიჯებით დადიოდა.
  ხმა ჯერ კიდევ ბავშვური ჰქონდა, მაგრამ იბოხებდა.
  შებინდებისფერი პირისახისა იყო, მაგრამ ვეღარ უბედავდნენ ტარაკანასთან შედარებას.
  პეპო, მოდი რა, გააგებინე რამე ამ სირს! _ საქმის გასარჩევად უხმობდნენ ხოლმე უბნის უსაქმურები. ქურთი სასაცილო სერიოზულობით უსმენდა მოდავეების არგუმენტებს და ბოლოს მხარეთა შერიგებით ასრულებდა ჩხუბს.
_ ფუჰ, თქვენ ხალხი არ იყოთ, რა გაჩხუბებთ, ტო! _ გახარებული, რბილად ტუქსავდა შერიგებულებს.
  ოთხი რამ სწამდა ურყევად:
1. მამამისი არაკაცი იყო.
2. მადრიდის რეალი ყველაზე ფარჩაკი გუნდი იყო პლანეტაზე.
3. ქალი და რესტორანში მუშაობა _ პაჰ, პაჰ, პაჰ...
4. ქართველების დამეგობრება მოსულა, შეყვარება _ არა.
  კიკის მკერდი ჰქონდა ბრტყელი, თორემ ცხვირი მოუთმენლად გრძელი ება. პეპოს არასოდეს ჰქონია ნატიფი გემოვნება და ამიტომ გოგოს გარეგნობაში ხინჯი არ შეუნიშნავს. თანაც სომეხი იყო კიკი და ამით კიდევ უფრო მიიზიდა ბიჭი.
  ცოლი მომყავსო, ახარა სამეგობროს ერთ დღეს. ვის არ გაუხარდებოდა პეპოს ბედნიერება და სამზადისიც ჰქმნეს, მაგრამ ქურთი მეორე დღეს დააპატიმრეს. მსხვილი ნაკოლი ავაგდე და კლასი არ მეყო მის შესასრულებლადო, ყვებოდა მერე.
  იმ დღეს რამისა პურზე წასმული ფეხსაცმლის კრემით დათვრა ციხეში.
  იმ დღეს მადრიდის ,,რეალმა“ 1:2 წააგო ბილბაოს ,,ატლეტიკთან.“
  კიკიმ რესტორან N-ში დაიწყო მუშაობა, ხანი რომ გამოხდა.
  პეპოს უმრწესი ძმა, ჯერ ძალიან პატარა იყო ქურდბაცაცობისთვის...