,,спокоен как Как пульс Покойника“

                                  В. МАЯКОВСКИЙ

ხელი გაგიშვი, უფრო მშვიდად იგრძენი თავი,
ბევრს ნუ იფიქრებ, რა მომელის. უბრალოდ წადი!
თუ დაკარგული მაჯისცემა ისევ მიპოვის,
მაგასაც გეტყვი.

არ მოგაბეზრებ თავს უაზრო სენტიმენტებით,
დაგუბებული ჰაერივით გავალ და ოთახს
მთიდან მობერილ ნიავს დავუთმობ,
რომლადაც, ჩემი მცდელობების მიუხედავად,
მე ვერ ვიქეცი.

და ყოველივეს ეშველება ბოლოს და ბოლოს,
სიცარიელე არილივით შემოვა ჩემში,
იგი შეავსებს ოთხივე კუთხეს. -
ბავშვობიდანვე ვერ ვიტანდი სიცარიელეს.

ხელი გაგიშვი, მაგრამ თავს კი ვეღარ ვპატიობ
რომ შენი ხელი არასოდეს მეკავა ხელში.


      12:14
        13.05.2017წ.