ხდება ხოლმე და არის პერიოდი,
როცა სიჩუმეში გადამდის პოეზია,
როცა მენატრება სტროფი ორიოდე,
როცა უშენობა მაღალ დონეზეა,
როცა კატასავით უხმოდ ვიტრუნები,
როცა რძენასვამზე ძილი მოცურდება,
როცა კათარზისის ძველი ვიტრინები
მარტოს მირეკლავენ, როცა მოხუცები
გაზეთს კითხულობენ, სერიალს უცქერენ,
ღიმილით მალავენ წლებსა და ნაოჭებს;
როცა ყველაფერი გრძელდება უცვლელად,
როცა ეს სამყარო ვერაფრით მაოცებს,
ხდება ხოლმე და არის პერიოდი,
როცა სიჩუმეში გადამდის პოეზია,
როცა მენატრება სტროფი ორიოდე,
როცა უშენობა მაღალ დონეზეა...