რას არ იტყვიან სიმთვრალეში,
რას არ იტყვიან...
რა საკითხია ისეთი, რომ მათ არ იცოდნენ?!
წაკითხულია ბევრი წიგნი, მაგრამ ბიბლიამ,
ვერ წაგვაკითხა უფლის მცნება, სულ ათიოდე.

ჩვენ მხოლოდ ვსვამთ და ალკოჰოლით ვპროფესორდებით,
ისე ვართ თითქოს, ღმერთობამდე ცოტა გვიკლია.
ამძორებული, გაუშიგნავ მყრალი თევზივით,
წიგნების თაროს ტვირთად აწევს ძველი ბიბლია.

ვკითხულობთ მორალს, პოეზიის გვაცვია ფორმა,
მაგრამ პოეტის წაგვრთმევია სულიერება.
აქ ხომ ლექსებიც ეზოსავით შემოიღობა
და სტრიქონებს ძოვს ყველა, ვისაც არ ეზარება.

გაჭირდა ისე, რომ სულები გავარობოტეთ,
ქვეყნად კი კაცი, აღარაა თავისუფალი.
მე ჩემი ჯვარი, ვიტვირთე და ვზიდავ ბოლომდე,
თუ სხვების მსგავსად, მასზე ღმერთი არ გავაკარი...