დამალობანას თამაში
- ჭიტა!
თითქოს მოტივი მხოლოდ ის არის,
შემოგაბრუნო ჩემკენ და
გითხრა -
(ეს ყველაფერი ბოდვაც კი არის),
რომ თურმე ფიქრებს ჰქონიათ ჭლექი,
თითქოს დავდივართ დანების წვერზე,
და მე დავკარგე ყველაფრის ბედი -
თუმც ერთ იმედსაც ვამყარებ "ჩვენზე".

დამალობანას თამაში
- ჭიტა!
ყველა მცდელობა ყოფილა ფარსი!
(მოგებას სადღაც დაუსხლტა ფეხი..),
რადგან მე ვეღარ ავიტან აწი,
რასაც კი არ სდის სურნელი შენი.

დამალობანას თამაში
- ჭიტა!
მინდა დაგნებდე და გითხრა რაღაც -
შენთან მკლავებში სიკვდილიც ღირდა,
(თუმც არჩევანი მიიღე სხვა და) -
სიცოცხლე ასე - უშენოდ გავა.
და არ ექნება არაფერს აზრი -
"მე ხომ მოვედი", - გეტყვი და წავალ,
და შენ კი ამ დროს
რომ გეთქვა - "დარჩი",
არ გეყო ძალა.
და ახლა მე ვარ, უძლური შენით,
არ გეტყვი - ჭიტა!
(შემყრია თურმე სიბრმავის სენი).
და ეს ლოდინი - ყველაზე წმინდა,
როგორც მდუმარე აკლდამის ძეგლი -
მე აღარაფერს მოველი შენგან,
სულ კი ეს იყო რაც უნდა მეთქვა...
დამალობანას თამაში
- ჭიტა!