-  სვეტიცხოვლობას  გილოცავთ!!!


მაღალ  გუმბათთა  გადასარჩენად
დაგეშილია  მძაფრი  სურვილი
და  მოსხეპილი  შენი  მარჯვენა
ჩაბღუჯული  მაქვს  ორლესულივით!..

თითქოს  სიცხიანს  და  ბეჭგანგმირულს
მორიელები  მასხდეს  მაჯებზე... 
და  ისე  მინდა,  რომ  შენს  მაგივრად
შური  ვიძიო 
შურის  გამჩენზე!..

მაგრამ  ანაზდად  შემომაფეთებს
აისი  პირველ  სხივებს  დამფრთხალებს
და  ჭერს  მიასრესს  ღამის  ნაფლეთებს,
ელდით  ფერმიხდილს  და  მოფართხალეს...

ღია  სარკმლიდან  სივრცეს  ერთიან
მოირბენს  მზერა  ნაუცბათევი  -
მაღალი  ყელით 
ლაჟვარდს  ერთვიან
გადარჩენილნი
შურს
გუმბათები!..

ალმოგზნებული  აისი  მიმზერს
და  მზეში
მტრედებს  გააქვთ  ტკარცალი
და  შურით  დავსილ  თვალების  ჯიბრზე
კვლავაც  მაღლდება
ჩემი  ტაძარი!..


1975 წ.

დღეს  ჩვენი  პატრიარქის  ნათლული  ჩემი  პატარა  ლექსო  2  წლისა  ხდება!