ნაწარმოებები



ავტორი: ანანე კიკნაძე
ჟანრი: პოეზია
23 დეკემბერი, 2009


კიბის ქვეშ

კიბის ქვეშ , იქ სადაც შეშის ალაგია
და წვიმა ჩუმ-ჩუმად წვეთავს;
მაშინ ხეჭეჭურის ჩრდილიდან
აქეთ გადმოაბეს ჯეკა.

კიბის ქვეშ, იქ სადაც ბავშვობაში
ტალახით ვამზადებდით კერძებს,
სადაც სახლობანას ვთამაშობდით
ბავშვობის აჩრდილებს ვეძებ.

გახსოვს - ამ კიბის ქვეშ ვასტუკებდით
სახლს უკან დამალულ ტოლებს,
ბებოს საგვიანო ვაშლები
მიწამდე აწვდენდნენ ტოტებს.

კიბის ქვეშ, იქ სადაც ნეკი-ნეკით
ბევრჯერ ვრიგდებოდით დღეში,
ერთმანეთს ვუყუვებოდით როგორ გავილუმპეთ
გადაუღებელ თქეშში.

კიბის ქვეშ, იქ სადაც შეშის ალაგია
და წვიმაც ქურდულად წვეთავს,
უკვე მერამდენე ზაფხულია
აქ აღარ დაუბამთ ჯეკა.

კომენტარები ილუსტრაციები რეცენზიები