გამზირი - ქუჩების კოლორიტი,
კაფე, აფიშები, თეატრები.
მივდივარ (რიცხვია მხოლობითი)
ვაფერხებ ნაბიჯებს. მენატრები.

აქვე უფერული ფანტანია,
წყალი თავქვე მიდის ხელაღებით,
ტვინში სტრიქონები იფანტება,
სკვერები, სახლები, ვერანდები.

ყავა კაპუჩინო. ვიოლინოს
რიტმი. ხემის სიმთან ლაპარაკი.
ალბათ, მარტოობაც იოლია,
როცა ფიქრი არ გაქვს აღარაფრის.

თმაფურცელგაჩეჩილს მალინისფრად,
ქარი გადავარცხნის ოლეანდრებს,
საღამო ლოდინით დაინისლა,
რიცხვი - მხოლობითი. (მომენატრე)