მკვლელი არა ვარ!
მერე რა, თუ ვერაფერს ვამბობ,
რა, თუკი შიში
მეუფლება მეც, შეჩვენების.
ეს სიზმარია,
გაღვიძებას ამაოდ ვნატრობ,
და, ჰორიზონტზე, 
ნატყვიარი მზე მეჩვენება.

მკვლელი არა ვარ! _
ცოდვის ხმაზე ჰყვირის ბარაბა,
თვალის დახუჭვით,
ზოგს ჰგონია,
რომ სხეულს მალავს.
არ ღირს არაფრად
ატეხილი დავიდარაბა,
შეუნიღბავი ნაბიჯები
აქვს სიკვდილს კვალად.

მკვლელი არა ვარ! _
ზურგნაქცევი მოთქვამს იუდა,
წყლის ნაცვლად,
ისევ სისხლით იბანს
ხელებს პილატე.
მსოფლიო ამხელს შეშფოთებას,
ბრბოს კი, ჯიუტად,
თავისი მარცხიც უხარია,
მტრების ჯინაზე.