მე იოანე ვარ და ამ შემოდგომაზე სკოლაში უნდა შევიდე. მიხარია, როცა დედა მეუბნება, გაზაფხულს შენფერი თვალები აქვსო...
        ბაბუაჩემს რომ გული ასტკივდა, დედა წამლის საყიდლად წავიდა და მას შემდეგ მხოლოდ ერთხელ ვნახე.
        ახლა მე და ბაბუ ვცხოვრობთ სახლში. მასაც იოანე ჰქვია. საღამოობით სულ წიგნებს მიკითხავს. ზოგჯერ ორივენი მოვიწყენთ. მერე გამიღიმებს და ამბობს, ისევ ჩემი წამლებისთვისაა დედაშენი წასული და შენც ბევრ შოკოლადს მოგიტანსო. ოღონდ თვითონ მოვიდეს და სულ არ შევჭამ ტკბილეულს.…
        გუგას ორბორბლიანი ველოსიპედი ჰყავს. ის ჩემი მეზობელია. ერთხელ მკითხა, დედაშენს მართლა არ გადაუხდია აფთიაქში ფულიო?...
        ბაბუა ამბობს, სკოლაში რომ შეხვალ, დედაც ძალიან მალე დაბრუნდებაო.
        მე იოანე ვარ და შემოდგომისფერი თვალები მაქვს.