ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე. დიდება უკრაინას !!!     * * *     Сла́ва Украї́ні !!!

ავტორი: მარიამ ბეროძე
ჟანრი: პოეზია
30 ნოემბერი, 2013


ჩემი მეგობარი

ჩემს მეგობარს
გული თითებიდან ეწყება,
ხელებით დააქვს ბედნიერება,
მხრებით ნუგეში და
ცარიელ ხალხს ურიგებს.

ჩემი მეგობარი
შეყვარებულია,
ქარვისფერ მკლავებს
ჯვარედინად ილაგებს მკერდზე
და ჩურჩულებს :
"მე მიყვარს გოგო
ლილისფერი თვალებით"

(ამასობაში)
ჩემს მეგობარს
ფოთლები უყვითლდება,
უხმება და სცვივა,
თვალებიდან ეპარება შემოდგომა,
მალე დაუზამთრდება.

ჩემი მეგობარი
ავადაა,
მეტასტაზებს ებრძვის -
დგას,
ფესვებით ეჭიდება მიწას და
ლოცულობს:

"-უფალო, იესო ქრისტე,
ძეო ღვთისაო,
მე მიყვარს გოგო
ლილისფერი თვალებით,
აცვია გაზაფხული და
მსხმოიარე ალუბლები...
დაიფარე!"

კომენტარები ილუსტრაციები რეცენზიები