ნაწარმოებები



ავტორი: რენუარი
ჟანრი: პოეზია
23 აპრილი, 2015


ცირკი ( ირო–ტასოს და ლაზარეს)

დღეს ჩემი სასტუმრო ოთახი
მოიწვევს ორკესტრს და აინთებს ჩირაღდნებს.
იჩქარეთ! იჩქარეთ!იწყება!
ნომერიიი პირველი:
–ალეეე ჰოპ!
ტყუპები დგებიან ყირაზე.
მე ახლა, 
ბრჭყვიალა კაბაში მორთული მწვრთნელი ვარ,
დავდივარ. ბაჯბაჯით დამყვება ლაზარე
და როცა სატირლად პირს აღებს,
კანფეტებს ვუდებ და
ბელივით მორჩილად ვატარებ.
მაგრამ წარმოდგენა
ოდესმე უთუოდ მთავრდება,
მოდიან მშობლები
და მიჰყავთ ბავშვები,
მივაწყობ არეულ არენას
და მარტოდ –
მტირალა კლოუნი –
დავრჩები.

კომენტარები ილუსტრაციები რეცენზიები