ყველამ ვიცით გალაკტიონის ლექსი "გაგონდება თუ არა კარალეთის დღეები"

მე შემოგთავაზებთ ჩემებურ ინტერპრეტაციას ამ ლექსისა, თუ როგორ დაწერდა - ოთარ ჭილაძე, გიო საჯაია, ზურაბ გორგილაძე და თემურ ელიავა.


როგორ დაწერდა - ოთარ ჭილაძე

ნეტავ თუ გახსოვს დღეები ლურჯი?
იმეორებდნენ მთები სტრიქონებს,
და როგორც უცხო სამოთხის ხურჯინს,
დღეს კარალეთის დღეებს ვიგონებ.
კიდევ თუ შეგრჩა თვალები ცელქი?
თუ დრომ თავისი მზერით დადაღა
და ჩვილი როგორც სიარულს ებრძვის,
მე ისე ტკივილს ვებრძვი, სადა ხარ?
მხარდამხარ ყოფნის დღეებიც ვთვალე,
მსურს შენი ყელი, თითები, თმები...
მარტო ვზივარ და მაგ თვალის ალებს -
ფიქრში ვაღვივებ და ასე ვთბები.


როგორ დაწერდა - გიო საჯაია

დღეები, კარალეთი, გაგონდება?
სამოთხე, კამარა, საუბარი.
ლურჯი ქალაქი, ვაგონები,
არა მედიდურად დანაბერებს -
თუ შეგრჩა თვალები მხიარული?
დრო არის სიმორცხვე, მაგალითი.
მივდივართ მხარდამხარ, სიარული,
ნაბიჯი, სადა ხარ? ღალატია!


როგორ დაწერდა - ზურაბ გორგილაძე

ჩემო კუნწალავ, კარალეთში გახსოვს დაგსდევდი,
ფეშტყემლის სურნელს თუ იგონებ, ოდას ბუხრიანს?
გახედე ამ ლურჯ სამოთხეებს, ამ მთებს თვალსეირს,
თითქოს ხორუმის ცეკვისას რომ ჩაუბუქნიათ.
სადა ხარ ახლა ლეღვიჩიტავ,
სულის ფანცქალო?
რომელ მხარეს ხარ? -
უშენობა აღარ მაცალო.


როგორ დაწერდა - თემურ ელიავა

გაგონდება თუ აღა - შორს ცის კაღალეთზე,
მთების კამარას რომ ქარი აშრიალებს,
ლურჯი ქედები რომ მიწას დაალეწეს,
მაშინ დაგინახე ქალო თავშლიანო.
ნეტავ კიდევ შეგჩა თვალნი მხიარულნი?
თუ დრომ ჩაუქროლა? ვეღარ შეგიყვაღე,
შენ სხვა მხარესა ხარ, მე კი გიხსენებ და
ქაღიც ამოვარდა, პალტო შევიკარი.