ნაწარმოებები


ახალი კონკურსი “ლილე-2020“     * * *     დაწვრილებით ფორუმზე: ურაკპარაკის ფორუმი >> კონკურსები >> ლილე-2020     * * *     http://urakparaki.com/?m=13&Theme=1519     * * *    

ავტორი: რ_____ო_____ი
ჟანრი: პოეზია
29 სექტემბერი, 2016


# # #

ცივი საწოლი, სამოვარი, ძველი მრიცხველი,
აკვარიუმი, კენტი თევზი, - ცისფერლაყუჩა.
მე მაგ თვალების უფსკრულებში გადავიმსხვრევი,
თუ არ დახუჭავ.

გახსოვს თამაში? რომ ვუძლებდით თვალის ხამხამებს,
ოთახიდან რომ მივფრინავდით ფიქრის ჩემოდნით,
რომ მოვდიოდი შენს ხელებთან, თმებთან, ღამ-ღამე,
და ვთენდებოდით...

მე მომენატრა წვიმისფერი შენი თითებიც,
სანთლებივით რომ ლიცლიცებდნენ უწინ ხატებთან,
რას ვიფიქრებდი, - სამუდამო ცეცხლს თუ მინთებდი,
მაშინ არ მწვავდა, გზას მინათებდა.

ახლა, თუ ხედავ, ჩემს სიზმრებში როგორ შემოდის, -
მოგონებები, ტკივილები, ბოლო ღამიდან?
შენ, ჩაიფიქრე, - სამუდამოდ რომ გყვარებოდი...
და... მე ამიხდა...

კომენტარები ილუსტრაციები რეცენზიები