ნაწარმოებები



ავტორი: პალადა
ჟანრი: სხვა
ამ ჟანრის ნაწარმოებები არ ფასდება
12 იანვარი, 2018


შობა - ახალ წელს გილოცავთ!

შობა - ახალ წელს გილოცავთ, მართლმადიდებელნო, საუკეთესო სურვილებით და ვაჟას ბრწყინვალე "ვედრებით":

ჩემი ვედრება / ვაჟა - ფშაველა (1893 წ.)
.
ღმერთო, მიიღე ვედრება, ეს ჩემი სათხოვარია:
არ დამეკარგოს გულიდან მე შენი სახსოვარია!
გულს ნუ გამიტეხ ტანჯვაში, მამყოფე შეუდრკელადა;
ვფხიზლობდე, მუდამ მზად ვიყო დაჩაგრულების მცველადა.
ბალახი ვიყო სათიბი, არა მწადიან ცელობა;
ცხვრადვე მამყოფე ისევა, ოღონდ ამშორდეს მგელობა;
არ წამიხდინო, მეუფევ, ეს ჩემი წმინდა ხელობა!
მაშრომე საკეთილოდა, თუნდ არ მოვიმკო ნაყოფი,
შვილთ საგმოდ არ გამიხადო ჩემი მუდმივი სამყოფი.
გულს ნუ გამიქრობ ლამპარსა, მნათობს ტრფობისა შეშითა,
ნუ მავლევ ქვეყანაზედა გაცივებულის ლეშითა, -
თვალებში მადლ-დაკარგულსა, შუბლზე გაკრულის მეშითა.
ნუ დაუკარგავ ჩემს სატრფოს მადლს, გულზე ცეცხლის მდებელსა,
ნუ დაუძვირებ ოცნებას, შენს ხმას, სხივ-გამომღებელსა:
სიცოცხლედ უღირს ბეჩავსა, ეძახის თავის მხლებელსა.
გულს დარდი გამიდიადე იმ სანეტარო საგანზე,
დაწერე ფიქრი, ღრმა, მწვავე ჩემის გონების საბანზე!..
გონებას ფიქრი სტანჯავდეს, გულს ცეცხლი სწვავდეს ძლიერი,
მშიოდ-მწყუროდეს კეთილი, ვერ გავძღე, მოვკვდე მშიერი…
ნუ დამასვენებ ნურა დროს, მამყოფე შეძრწუნებული,
მხოლოდ მაშინ ვარ ბედნიერ, როცა ვარ შეწუხებული;
როცა გულს ცეცხლი მედება, გონება მსჯელობს საღადა, -
მაშინ ვარ თავისუფალი, თავს მაშინა ვგრძნობ ლაღადა.
მფარავდეს შენი მარჯვენა, კალთა სამოსლის შენისა,
სანამ არ მოვა დრო-ჟამი სულ ბოლოს ამოქშენისა.
სული - შენ, ლეში - მიწასა, აღარა ვგლოვობ ამასა;
თევზი - წყალს, ცასა - ვარსკვლავი, შვილი - დედას და მამასა.

აქვე, განსაკუთრებული პატივისცემით, მინდა მივულოცო შობა - ახალი წელი ამ საიტის დამაარსებელს და მინდა ვუსურვო, პირველ რიგში, ბედნიერება, ჯანმრთელობა, დღეგრძელობა და ამასთან - ყველაფერში ისე მომართვოდეს ხელი, რომ კიდევ ბევრი კეთილშობილური საქმის გაკეთება შეძლოს თავისი ერისთვის და ხალხისთვის!

აგრეთვე, განსაკუთრებული სითბოთი, მინდა მივულოცო შობა - ახალი წელი: შუშის კაცს, დათო ქარჩავას, განთიადელს, მუხას, თაზო ქიზიყელს, ნ.ფხოველს, ბლაგვს, ნექტარს, ნათთიას, ნეფერტარს, ლელა მგელაძეს და ვუსურვო მათ ყველა კეთილი სურვილის თუ ოცნების ასრულება, ბედნიერება, ჯანმრთელობა და დღეგრძელობა!(პირადად მილოცვებს - ალბათ უფრო შემდეგ შემოსვლაზე მოვახერხებ)

P.S. დაგვიანებისთვის, იმედია მომიტევებთ: როგორც იქნა შემოვაღწიე... :)

კომენტარები ილუსტრაციები რეცენზიები