????????????????????????
ეზოში რატომ აღარ დგას ვანა.
სად არის ჩემი უკანა მერხი.
ვინ მოჭრა ჩემი მაღალი მსხალი.
ბილიკი რატომ არ არის სადაც
დავტოვე. ღელე რატომ არ მოდის.
რატომ არ წვეთას წყალი ჭერიდან.
ან დაბზარული ფეჩი სად არის.
ჟანგიან ჭიშკარს რა მოუვიდა
შეღებეს, მაგრამ რად არ ჭრიალებს.
მეზობლის ჭიშკრის ხმაც არ მეცნობა.
რატომ აშენდა ამხელა ხიდი.
მე რომ საკუთად ბავშვობად ვთვლიდი
სად გაქრა. ჩემი გულწრფელი ლექსი
ვინ წაიკითხა. ჩემი ბოსტანი
სად არის ანდა ღობე ამ ბოსტნის.
სად არის ნეტავ ჩემი კათმები.
ჩემი უკბილო ხერხი სად არის.
ჩემი ბუხარი და დიდი ქვაბი
ფსკერზე დამხმარი ტკბილი თათარა.
და გზები მე რომ გამომატარა
ერთი სიცოცხლე, რად არ მტვერდება.
ბურატინოს რომ მეძახდა ბიჭი
სად არის ვიცი მაგრამ თქმა მიჭირს.
რატომ აღარ ვცემთ ტელევიზორებს,
მეზობლის ბავშვებს და ხმას ერთმანეთს.
წარსულიდან რომ გამოგვისროლა
ის საქანელა რა კარგი იყო,
მახსოვს რომ გაწყდა მაგრამ ფიცარი
შავი ფიცარი სად არის ფიქო?