***
- ილია, მე მალე ჩამოვალ. კარანტინის სამი დღე დამრჩა. გამიხარდა, ფეისბუქში რომ გაწევრიანდი, ხშირად მოგწერ ხოლმე.
ილია, აქ ხარ? რაღაც უნდა გიამბო, უფრო სწორად, მოგწერო:
ძალიან, ძალიან დიდი ხნის წინ ერთი წიგნი წავიკითხე. არც ავტორი მახსოვს, არც მოთხრობის სათაური, არც გმირის სახელი და არც ქალაქის, რომელშიც ეს ამბავი ხდებოდა.
შორეულ, შორეულ ბავშვობაში წავიკითხე. ილია, აქ ხარ?
- ki
- ჰოდა, ძალიან ნათლად მახსოვს ერთი რაღაც, რომ ამბავი პატარა ბიჭზეა. შენხელა იყო.
- eg saidan gaxsovs
- იცი, რატომ დამამახსოვრდა? - ბიჭი 11-ის იყო და მეც, როცა ვკითხულობდი, 11-ის ვიყავი, ანუ ის ჩემხელა იყო მე - შენხელა და გამოდის, რომ ბიჭი შენხელაც ყოფილა.
- ramdeni tseli gavida
- ზუსტად ნახევარი საუკუნე. :)
მოკლედ, ეს ბავშვი ერთ დილას ცარიელ ქალაქში გაიღვიძებს, ქუჩაში გამოდის და აღმოაჩენს, რომ ირგვლივ არავინაა და სულ მარტოა, თან ყველაფერი ღიაა და მის სიხარულს საზღვარი არა აქვს; არავინ არაფერს უშლის: შეუძლია, დაჯდეს კარუსელზე, კარუსელიც უფასოა, წარმოგიდგენია?! არც დრო აქვს შეზღუდული; ანუ შეუძლია იმდენ ხანს იბზრიალოს, რამდენიც მოუნდება, გაიგე? შეუძლია შევიდეს მაღაზიაში, სადაც უამრავი ტკბილეულია, თან გამყიდველიც არსად ჩანს, ირგვლივ სიცარიელეა, მაგრამ - სრული თავისუფლება; ყველაფერი მისია, კი არ უნდა იყიდოს, უბრალოდ აიღოს; აი, საყვარელი სათამაშოების მაღაზიაც: სატვირთო მანქანები, მაიმუნი შინპანზე თოკზე და მოტოციკლი, - ეს ყველაფერი მისია. ჯიბეებს კანფეტებით ივსებს, ბედნიერებით გაბრწყინებული დაქრის ქუჩებში, მაღაზიიდან მაღაზიაში შედის... ირგვლივ კი არავინაა... ქუჩები და სახლები... ფიქრობს, ყველა ერთად სად გაქრაო! არც ტრამვაის მძღოლი, არც პოლიცია; ძაღლები და კატებიც არსად ჩანან.
მოიწყენს, მარტო არ უნდა, რომ უხაროდეს, ვინმეს ხომ უნდა გაუზიაროს; ბოლოს და ბოლოს ეს ყველაფერი ვინმეს ხომ უნდა გაუყოს, მაგრამ ვის?!
დანაღვლიანდება, მოენატრება თამაში, ვის ეთამაშოს?! ყველაფერს დაყრის, ხან ერთ ფანჯარას მიადგება, ხან - მეორეს, ეძახის ბავშვებს, უსტვენს, მაგრამ პასუხს არავინ სცემს.

და უეცრად ბიჭს ეღვიძება და სიხარულით ცას ეწევა, რომ თურმე ეს ყველაფერი სიზმარი ყოფილა. თითქოს კარგი სიზმარი, მაგრამ თან - საშინელი. ისეთი ბედნიერია, რომ სიზმარი აღმოჩნდება, უბედნიერესი, გესმის?
ნეტავ ვინ არის ავტორი, რამ დააწერინა ეს ამბავი?! ილია, აქ ხარ? კოკოშ, წახვედი? სად წახვედი, ბიჭო?
_____________________________________________
- be aq xar auuuf ramdeni dagitseria jana sad xar?
_________________________________________________
- აქ ვარ, შენ სად ხარ?
____________________________
- is bichi da shen ukve daberdit be da me akhalgazda var
- მე - კი, ის ბიჭი - არა! წიგნის გმირები არ ბერდებიან.
- rogor ara jana stvena icodao da exa marto bebrebma ician stvena
imito ro aravis ar chirdeba eg stvena arc fanjrebtan yvirili
- ილია, ეგ ხომ სიზმარი იყო.
- be, adamianebs xo is esizmrebat rac
- რატომ უნდა დასიზმრებოდა იმ ბიჭს?
- mwerals daesizmra 50 welshi rac moxdeboda is da dawera kai be tsavedi kai
- პაკა, კოკოშ, მიყვარხარ!
- mec
_________________________________________
- jana aq xar
_______________
- beb aq xar
________________________________
- ილია, რა იყო, აქ ვარ, ჰო.
__________________________________
- chvenc gavighvidzebt bebi