ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე. დიდება უკრაინას !!!     * * *     Сла́ва Украї́ні !!!

ავტორი: დერვიში
ჟანრი: პოეზია
30 აგვისტო, 2020


ნატო ბებია

მორჩილად სხედან ჩასასვლელთან მეტრო ღრმაღელის,
მოხუცებული ბებიები, ღერებს ჰყიდიან,
ნატოში შესვლის პერსპექტივა აღარ აღელვებთ,
ნატო ბებიას საფიქრალი უფრო დიდია.
მანაც ომის დროს, აფხაზეთში შვილი დაკარგა,
მეუღლეც შვილზე ფიქრს გადაჰყვა-გულის ინფარქტი...
განირჩეოდა დღენიადაგ მისგან ავ-კარგი,
უმალვე პასუხს მოგიგებდათ, როცა ჰკითხავდით
სუბტროპიკული, ტენიანი ჰავის თვისებებს,
ციტრუსის მოვლას, ჩაის კრეფას, კიდევ უამრავ
საჭირო ცნობას, მთვარე მარტში როგორ ივსება,
მთვარე, რომელიც მოიტაცეს, გადაუმალავთ.
გეტყოდათ, როგორ გადასახლდა უწინ, ჩამბაზე,
რაოდენ ახლოს იყო სახლთან შავი ზღვისპირი,
ახლა, ქუჩაში გამოსული, როგორც ჯამბაზი,
წარსულ დღეებზე ვერც იცინის, ვეღარც მისტირის.
წყვილი კურცხალიც არ გადმოდის ამომშრალ თვალებს,
ყოველი დილა-წინა ღამის პარაკლისია...
რომ საღამომდე გაყიდული ღერები თვალოს,
დაახარისხოს პურის ფული, ქირა, ნისიაც.
მორჩილად იჯდეს ჩასასვლელთან მეტრო ღრმაღელის,
სადაც წლებია ბებიები ღერებს ჰყიდიან...
ნატოში შესვლის პერსპექტივა აღარ აღელვებს,
ნატო ბებიას საფიქრალი უფრო დიდია.

კომენტარები ილუსტრაციები რეცენზიები