რომ არ ვეგონოთ მოსეს ხამები,
სიზმრად მოვიხსნათ მოსასხამები,
ღამეც ვიხილოთ ნასისხამები.
დავთესოთ ბარდა, ოსპი, სოიო,
დავახატინოთ მახა გოიას
და ავამღეროთ ვიქტორ ცოიო.
თუ მოგერია ძილი ან ბრაზი,
მაშინ გასცურე მკლავური, ბრასი,
ან მიაპყარი თვალები ბრაზე.
მოხაზე ფიჯი და ავსტრალია,
ხან ხარ, ხან არა, ხან ასტრალია,
ბაბუს ულვაშიც ნაასტრალია.
წიგნებს მალული მოაქვს დოვლათი,
ჰკითხეთ აკუნინს, ბუნინს, დოვლატოვს,
ხან წვიმად მოხვალ, ხანაც თოვლადო.
რომ არ ვეგონოთ მოსეს ხამები,
სიზმრად მოვიხსნათ მოსასხამები,
ღამეც ვიხილოთ ნასისხამები.