ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე. დიდება უკრაინას !!!     * * *     Сла́ва Украї́ні !!!

ავტორი: ფლორენცია
ჟანრი: პოეზია
27 თებერვალი, 2021


ყველას ვერ აამებო

ყველას ვერ აამებო -მითხრა ბებომ
და ხელში დამანჭული ატმის გუნდა ჩამიდო.

ყველას ვერ აამებო -  მითხრა პაპამ
და ნაზად გადამისვა ხელი ცრემლებით დაცვარულ თმაზე.

ყველას ვერ აამებო - მითხრა მამამ
და გულში სიკეთის სახელმძღვანელო მიანდერძა.

ყველას ვერ აამებო - მითხრა დედამ
და სარკე მომცა თვალთათვის, სმენა-ყურთათვის, შეგრძნებები მომცა და მკვეთრი ყნოსვა მიწილადა.

ყველას ვერ აამებო მითხრა ყველამ, ვისაც ვუყვარდი და ჩემი გზის საპოვნელად გამომიშვეს.
თან თოკი გამომაბეს, რომ არ დავკარგულიყავი, რომ ისე შორს არ წავსულიყავი, ფესვები არ დამეკარგა.

ყველას ვერ აამებო - ვუთხარი საკუთარ თავს
და დედის ნაჩუქარ სარკეში ანარეკლს გავუღიმე,
მამის სიკეთეები მოვიმარჯვე,
მაღაზიის დახლზე ისევ დაღრეჯილი ღორჯოიანი ხილი ამოვარჩიე, დაცვარული თმა შევისწორე
და გავუდექი ჩემს გზას, რომელსაც აქეთ-იქიდან კი უყეფენ ავი ძაღლები,
თუმც ვერას მაკლებენ,
რადგან მე მათი არ მეშინია!

კომენტარები ილუსტრაციები რეცენზიები