აიკრიფა "ვეშ-მეშოკი" ცნობიერიდან ყველა საღმა აზრმა
და ქვეცნობიერში გარდამისახლდა
და ამის მერე, მხოლოდ გუმანით თუ ვხვდები რამეს,
მხოლოდ გულისთქმა თუ მიმანიშნებს ავსა და კარგზე.
ხანდახან ის ხმაც, ისე მიზარმაცდება, რომ
მესიჯად კი არადა ჩურჩულით, მინიშნებითაც კი ეზედმეტება ხმის გაცემა.
მერე რა, რომ მოტივაცია დავუკარგე და ერთ დიდ, ცოცხალ-მკვდარ, მოსიარულე კატასტროფად ვიქეცი,
რომელიც სინდისის სიმებზე დაკრულ მუსიკაზე ცეკვავს ჩიჩოტკას.
მერე რა, რომ  ჩემს ქმედებებზე ყველას საკუთარი ინტერპრეტირების სურვილი უჩნდება და სულ წიხლზე ჰკიდიათ თავად ქმედება, როგორც ასეთი.
მერე რა, რომ იასამნისფერი ოთახები გამიხუნდა,
გამიხმა ეზოს ყველა იასამანი და ახლა სხვის გაზაფხულებზე,
მხოლოდ სხვისი ბაღის იასამნებით ვტკბები.
მერე რა, რომ გამბედაობა არ მყოფნის საკუთარის დარგვისათვის, რადგან სარეველებისა და სამყურებისაგან, მაყვალ-ბარდებისაგან მერიდება მიწის გასუფთავება, მეხათრება მათი ამოძირკვა.
მერე რა, რომ მეც, უფრო ხშირად უკვე, ვიდრე ხანდახან , მეზარება ცხოვრება.
მაინც ველი, ჩემი გული როდის მომაწვდის განძის კი არადა, ბედნიერების კოორდინატებს.