ნაწარმოებები


ლიტ. კონკურსი - - “რჩეულის-რჩეული“     * * *     დაწვრილებით ლიტ-მოვლენაში

ავტორი: ფლორენცია
ჟანრი: პოეზია
26 აპრილი, 2021


... გედის სიმღერა

მომხვიე ხელი სანამ დროა, მომხვიე ხელი
გამითბე ყინვის მოტივებით დამძვრალი ძვლები
დამშრალ ტუჩებზე სულის ნამით მასულიერე
თორემ უდროოდ გარდავიცვლები.

მომხვიე ხელი და მიმიზიდე შენს ძლიერ მკერდთან
სადაც გულის რიტმს ემორჩილება სისხლი ვენებში
დამალევინე შენი ხელით ნაჟური სითხე
ვიდრე უეცრად გარდავიცვლები.

და თუ არ მოხვალ, მერე იქნება სულ მთლად გვიანი
მერე იქნება მერეების ამაო ჯავრი.
მერე იქნება არაფერი, სულ არაფერი
თუ კი მომკლავენ.

მოდი ამ წამს და ჩამჩურჩულე ყურში სიტყვები
ამდენი წელი ამდენი ხანი რომ ელის სმენას
ჩემი სიზმრები გადმოვფინე ლექსად და აწი
დასანანიც კი არაფერია.

მომხვიე ხელი, თუმცა სიყალბეს ვერ აიტანს ერთი მტკაველიც,
გრძნეული კანი ვერ გაპატიებს დაცემას-ტყუილს
ტკივილს ვერ ვანდობ ტრანკვილიზატორსა თუ მორფინს,
და თუ კი მოვკვდი
და თუ კი მომკლეს
და თუ კი .... თუ კი....
იცოდე, სიმშვიდეში ფერი ვიცვალე!

კომენტარები ილუსტრაციები რეცენზიები