ნაწარმოებები



ავტორი: დერვიში
ჟანრი: პოეზია
20 ივნისი, 2021


ქარი


დღეს ჩემს გვირილებს ისე სწყუროდათ
სიცოცხლე. წყალი. სიო. ლარნაკი.
მინდორიც როგორ ჰგავდა სუროგატ
დედას, რომელსაც დიდი მარაგი
ჰქონდა გვირილის ფურცლის, ღეროთა.
მე, როგორც ქარმა, ისე გავრისკე
მათი მოწყვეტა. მახსოვს, ვმღეროდი
და იხრებოდა ღერო-ქარისკენ
და, როცა გაწყდა მათი კავშირი
და, როცა ქარის ქანციც გამიწყდა,
მე, როგორც ქარი, ისე დავმშვიდდი,
მე, როგორც ქარი, მაგრამ სამიწე,
მაგრამ აშარი და ურცხვი ქარი-
მიწასთან კავშირგაწყვეტილ ღერებს
ვაბნევდი შენი სასახლის კართან
და შენ ისმენდი ქარის სიმღერას.

კომენტარები ილუსტრაციები რეცენზიები