ნაწარმოებები



ავტორი: ლელა მგელაძე
ჟანრი: პოეზია
19 ივლისი, 2021


ჭეშმარიტების გემო

"ცნობიერება არის ერთი ეგზემპლარი.
იგი ჩვენ კი არ გვაქვს, ჩვენ ვართ ცნობიერებაში".( მამარდაშვილი)

ყველაფერია ნათქვამი და
გადათელილი - ყველა ბილიკი.
დროს დაუტესტავს ყველა ანდაზა,
მოყოლილია ყველა არაკი.

არა იმიტომ
ვერ გაატანს  ვახშმამდე თავსხმა,
ბრძენმა რომ ბრძანა
და არც იმიტომ, მხოლოდ შიგთავსს
თუ დაღვრის კოკა,
პოეტმა რომ თქვა
ჭეშმარიტება ოკეანეა, დროჲს მიღმა მყოფი.
ზოგიერთს უცებ მოვარდნილი მოწყვეტს ღვარცოფი,
დახრჩობამდე აყურყუმალებს
ზოგს კი ობობას ქსელის
მსგავსად სუსტად დართული
ძაფით ეწევა წელი წელზე გადახლართული.
ბევრმა ჩაყლაპა მისი არჩივი,
ვრცელია მათი ხსოვნის არქივი.
ერთი ჭურჭლიდან სხვადასხვა წყალს
ხომ ვერ დალევენ?!
ყველა წვეთსა და სუყველა დოზას,
გამოჟონილა რაც კი სილაში,
ერთი გემო აქვს - მომწარო მლაშე.

კომენტარები ილუსტრაციები რეცენზიები