● (ბოლო)
შემოფარფატდა მღვდელი მეტროში,
კალთის,
თმისა
და წვერის ფრიალით.
შემოიტანა
ვაგონში ტანი,
მძიმე ჯვარი და,
საკუთრივ თავი ...
და იქადაგა,
იქვე,
იმისთვის,
ვისაც ჭეჭყვაში შეახო თვალი,
შეახო ცხვირი,
შეახო ტანი.
მსმენელს ეკალი დაუცხრა კანზე,
კბილსუკან სწრაფად დამალა ენა,
გამოშვებული ჩაკეცა ბრჭყალი.
რადგან,
"ჯიპი"_დან კი არ დამოძღვრა,
რადგან,
ზემოდან კი არ დახედა...

მეტროში ძლივის შემოჭედილმა,
გაოცებული დატოვა ქალი.

●(პირველი)
როგორ განწყობასაც შევიქმნით
ისეთი იქნება დღე, თვე და წელი...
ირონიაა,
რომ ახალი წლის ამ პირველ დილას,
ფეისბუქქალაქს დამხვდა "ჩელენჯი" -
"შეჯამება - გასული წელი".
რამაც,
გადაალაგა გრძნობაც, განწყობაც.
შარშან დამტოვე,
მაგრამ დამტოვე
ისეთი სიტყვით,
რომ შემრცხვენოდა.
წელს სამწუხაროდ  უცხონი გავხდით,
მხოლოდ ამიტომ ვერ გიხდი ბოდიშს.