მე გავუმკლავდი მრავალ ქარიშხალს
და ამიტომაც კვლავაც ქარს ვუცდი.
ისიც არ ვიცი, ბევრის გაძლებით
გავძლიერდი თუ - უფრო დავსუსტდი.
კვლავ ძველებურად მიდის ცხოვრება,
თუმც, აღარ ვმალავ, რასაც ვმალავდი.
ეს ვერ გავიგე: ამდენის თმენით
გავიზარდე თუ - დავპატარავდი.
რა დავასკვენი? რა გამოვიდა?
ცხოვრება გადის, დარდი კი რჩება.
მაინც ჯიუტად ვიწყებ თავიდან
რაც არ გამოდის, რაც მეურჩება.
უკან მომყვება ჩამდგარი ქარი,
ციცინათელა დამდევს იმედის
და, ალბათ, სწორად გავაღე კარი,
არჩეულ გზასთან რაკი მივედი.
ჩემი ცხოვრება მრავალ ქარიშხალს
ითვლის და ვამბობ, რასაც ვმალავდი:
ვეღარ გავიგე, სულ მუდამ თმენით
გავიზარდე თუ დავპატარავდი.