ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე. დიდება უკრაინას !!!     * * *     Сла́ва Украї́ні !!!

ავტორი: დერვიში
ჟანრი: პოეზია
24 იანვარი, 2023


სიჩუმე. ყავა

დილით სიჩუმე გირჩევნია. ფინჯანი ყავა.
კოცნა არ გიყვარს. მებუტები. მზერას მარიდებ.
უსივრცობაში იყურები, როგორც მარიტა.
ტალახიანი პირი-სახით. დაღლილი გავით.
მე კი, ერთხელაც ვერ გაგითბე ცივი ხელები.
გულს არ ვუჩივი. გული უფრო ხშირად ცივდება.
მობნეულია იატაკზე: კაბა. წინდები.
შარვალი. კაშნე. ცხვირსახოცი. და გახელება
გასული ღამის. ჩამოცლილი საათით, ქვიშის.
ნალექიანი ფინჯანიდან გზა სჩანს, რომელიც
სახლამდე მიდის. არსაიდან სახლი მოგელის,
ცელქი ბავშვივით. ჯერ ადრეა ბავშვისთვის შიში.
და ჯერ ადრეა გაღვიძებაც. იძინოს ბავშვმა.
იქამდე ღრუბლებს დასცვივდება პირველი თოვლი.
იძინოს ბავშვმა. სიზმრებიდან რაშებით მოვლენ
უფლისწულები. სიზმრებიდან მოვლენ რაშებით.
შენ კი სიჩუმე გააჟღერე, უნდა ისმოდეს
ყოველი ნოტი სიჩუმიდან. ჩქამის აკორდი.
სანამ თოვაა და ღრუბლებში მზე არ აგორდა.
ჩუმად იყავი, სანამ რამე სიტყვას ისროდე...

კომენტარები ილუსტრაციები რეცენზიები