ზამთარია, ცივა, ცივა,
ყინვა გაბატონდა,
თოვლი რატომ იგვიანებს?
შარშან ამ დროს თოვდა.
ხის ტოტებზე ბეღურები
მიმხმარ ხურმებს ჰგვანან,
თვით ხეები გაყინულან,
გაუნძრევლად დგანან.
სიჩუმეა, სადღაც შორსღა
წყლის ლიკლიკი ისმის,
ყინვას ის არ შეეპუა,
ირგვლივ  შხეფებს ისვრის.
ბრაზობს ყინვა და არტახებს
უფრო მაგრა უჭერს.
წყაროს ირგვლივ წყლის წვეთები
გაიყინა უცებ,
მაგრამ წყარო კვლავ ლიკლიკით
მკვდარ სიჩუმეს არღვევს,
გაზაფხულის დაბრუნების
იმედს, ირგვლივ აფრქვევს.
რა გაყინავს? მას ხომ დედის
თბილი გული ათბობს,
ყინვა? ყინვის გაბრაზება
წყაროს მხოლოდ ართობს.