უილიამ ბატლერ იეიტსი - ის შეყვარებულს სიმშვიდეს უსურვებს

რბის ლანდისებრი ცხენთა რემა, ფაფარაყრილი,
ისმის თქარუნი და თვალები თეთრად უბრწყინავთ,
ღამეს მოაფენს ჩრდილოეთი მშვიდს და უწყინარს,
აღმოსავლეთი ეფერება სისხამს არილით.

შეეგებება დასავლეთი ნამის პკურებით,
სამხრეთი ხვდება ალისფერი ხანძრის ვარდებით,
ამაოებავ ძილის, სიზმრის, იშტის, დარდების,
ლაფში ეფლობა მსრბოლი რემა უბედურების.

თვალი მილულე, ჩამეხუტე, დავტკბეთ ლამუნით, 
მკერდზე დამედოს მოსაფონად შენი დალალი,
სიმშვიდის მწუხრმა შეიფაროს ტრფობა მალალი,
შთანთქას ცხენების ფაფარი და მშფოთი თქარუნი.

26 ივლისი, გაბრიელ მთავარანგელოზობა, 2023 წ.


ორიგინალი იხილეთ აქ: https://www.poetry-archive.com/y/he_bids_his_beloved_be_at_peace.html