გიშრისფერო ქმარო,
თვალებში ამოსულ მთვარესაც რომ აშავებ,
მითხარი რამდენად მიყიდე ჩემი სახლიდან?
მანამ მითხარი სანამ შენს მკერდზე თმებს დავწნიდე,
მანამ მითხარი სანამ თეთრი კაბა მაცვია,
მინდა ვიცოდე რა ვღირვარ და შენ რად გიღირვარ,
თორემ ხომ ხედავ, ჩემს სახეზე სიცილი გაქრა
და თავი სარმალე მგონია,
ჩემო გიშრისფერო ქმარო,
ის მაინც მითხარი, მე თუ სარმალე?
ჩვენი ქორწილი სამ დღეს გრძელდება,
და მხოლოდ შენი წარბებივით გადაბმული
სამი დღისა და ღამის შემდეგ შეგეძლება
ჩემთან სარეცელის გაზიარება,
სარმალესაც ხომ ასე სჭირდება?
ისიც ხორცია, როგორც მე,
და მასაც, ისევე როგორც მე _ მყიდულობ,
სამ დღეს ინახავ მანამ, სანამ გემოს გაუსინჯავ,
ეს სამი დღე კი, სუნი გცემს და სუნი გტანჯავს
ჩემო გიშრისფერო ქმარო,
ჩემო უმაღლესო არკანო, ეშმაკის გამოსახულებით,
მითხარი რამდენად გამიმეტა ჩემმა სახლმა.