გთხოვ არ მიმატოვო ამ მძიმე მომენტში,
მე თვითონ მაშინებს ჩემივე სიშლეგე,
უძღები შვილივით კვლავ შენთან მოვედი...
- ღმერთო მაპატიე და ისევ მიშველე.

ამ საბედისწერო გზების გასაყარზე,
ცახცახით მომდგარი კვლავ ვირჩევ არადანს.
იქნებ ეს სიგიჟე საღ აზრად გასაღდეს,
რომ მევე ჩავუდგე ჩემს ცოდვებს გარანტად.

და მსგავსად ნადირის - ხაფანში გაბმისას,
რომ არ გადავიღრღნა მაჯები ჩემითვე,
თუ ამგვარ სიშმაგის მოთოკვა გაჭირდა,
შენ ყოვლისმომცველო უფალო .. - შემინდე.

შემინდე მაშინაც - თუკი არ ვიწამე
ჩემივე თავის და ჩემივე სიმართლის,
რომ საგზლად შემომრჩეს ცალ პეშვში მიწა მე,
როს წავალ საძებრად გვირაბში სინათლის...