ქათმებმა, ინდაურებმა,
ბატებ-იხვებმა, ციცრებმა
ბჭობა გამართეს:- ახალ წელს,
რომ არ შევხვდეთო, იქნება?
საქათმესთან რომ ნაძვია
ლამაზად მოვრთოთ, მოვკაზმოთ,
არ დავიძინოთ, თორმეტზე,
ფრინველთა ბალი გავმართოთ.
ბატმა სისინით აუწყა:
-პრინცესა მე ვიქნებიო,
თავზე დავიდგამ გვირგვინს და
მსურს მოვიხატო ფრთებიო.
-მე კი, პრინცი ვარ, იცოდეთ-
ყელსაც იღერებს მამალი,
-მურა დავნიშნოთ დარაჯად,
არ იყოს აყალ-მაყალი.
-ვიტ, ვიტ - ბაჯბაჯებს იხვი და
თავაზობს ასეთ რამესო:
-ცელოფნით წყალი დავკიდოთ,
ის აირეკლავს მთვარესო
და განათდება მიდამო,
ბალი გვექნება ქებული,
ბალზე იცეკვებს ქათმების,
კიდევ ციცრების კრებული.
იხვები დავლურს დავუვლით,
კინტოურს - ინდაურები,
ნანახით კმაყოფილები,
ტაშს დაგვიკრავენ სტუმრები.
ილაპარაკეს, შეთანხმდნენ
და დაიძინეს ტკბილადა,
ესიზმრათ, ბალზე ცეკვავდნენ
და იღიმოდნენ თბილადა.