ნაწარმოებები


გამარჯვებას ვუსურვებთ გმირ უკრაინელ ხალხს რუს აგრესორზე. დიდება უკრაინას !!!     * * *     Сла́ва Украї́ні !!!

ავტორი: წეროს თოვლი
ჟანრი: პოეზია
24 იანვარი, 2025


.. შენ და ღმერთმა

ცა იანვრის ბოლო სუნთქვას იზეპირებს.
ცა ფიფქებით  ეფერება შავ ზღვას.
ფანტელები ანგელოზთა სიზმრებია
და შენს სიზმრებს,
სულ არაფერით არ გავს.

თოვლი წაშლის
სულს შერჩენილ ჰემატომებს.
მერე თოვლი
დიდ ხანს ვერ დადნება.
შენ და ღმერთმა ერთმანეთი მიატოვეთ..
დაივიწყეთ ლოცვა
შენ და ღმერთმა.

შორი იყოს ყველა დარდი..
შორი იყოს
და წაიღოს შენი თეთრი სევდა.
ზღვამ ფიფქები  ვერასოდეს დაივიწყოს.
სულ ახსოვდეს, როგორ..
როგორ თოვდა.

თოლიების გუნდი როცა გადაიფრენს
ჰორიზონტებს..
უნატიფეს სივრცეს.
დაგამშვიდებს დრომოჭმული დადაიზმი.
დაგამშვიდებს ყვავილები.
ნიცშე..

იყოს ღამე.
თოვა იყოს.
უსიზმრობა.
იყოს თუნდაც არაფერი. კვდომა..
იყოს სადმე ტობოსელი დულსინეა,
ოდესმე თუ
ლამანჩელი მოვა.

და ცხოვრებაც გაილიოს ზღაპარ-ზღაპარ.
იგავ-იგავ..
გახუნებულ პროზად.
როცა ხარ და
თითქოს, მაინც აღარსად ხარ..
მხოლოდ, ძველი ლექსის ბწკარში ბორგავ.

ალბათ, წაშლის თოვა ყოფნის ჰემატომებს.
ბოლოს თოვლიც უსათუოდ დნება.
რადგან ერთხელ
ერთმანეთი მიატოვეთ,
დაივიწყეთ ლოცვა
შენ და ღმერთმა.

Ⴋ.Ⴆ

კომენტარები ილუსტრაციები რეცენზიები