ნუ ტირით, მარიამ, მართა, -
ბევრს ნუ შემოახვევთ ტილოს.
ის, რაც თქვენს ძმას დაემართა,
არ არის, ჯერ, სასიკვდილო.

ოღონდ გწამდეთ სასწაულის
და ნუ არწყავთ ამ შემთხვევას
კაცობრივი საწყაულით -
არ ღირს ბევრი ტილოს ხვევა!

ოთხი დღე მოუწევს, დებო,
ლაზარეს საფლავად დება.
და ძმა, ქრისტეს მეგობრებო,
ცოცხალი დაგიბრუნდებათ.
...

- როგორ ჰყვარებია, ნახეთ,
ცრემლი ღაპა-ღუპით მოსდის...
- პეტრე, სხვებსაც დაუძახე
და გადააგორეთ ლოდი!

მეც რომ აღმადგენდე, ღმერთო,
ოთხ ასწლეულს ვიდებოდი...