ისე იცხოვრე,  როგორც შენ გინდა!
არ ღირს ცხოვრება ათას წვრილმანად.
გადაუხვიე მთავარი გზიდან?
და თქვას რაც უნდა ამან, იმანაც...
ისე იცხოვრე, შენს თავს მოსწონდე!
რაღაც ნარცისულს კი არ გთავაზობ.
უიღბლობები დაწვი კოცონზე!
თავის ირწმუნე, ჩემო ლამაზო!
სხვა რას იფიქრებს? იფიქროს თუნდაც,
შექმენი შენი გამოცდილება!
დაფიქრდი იმ სხვას შენგან რა უნდა,
შენი წინსვლა თუ შენი მხილება!
იყავი ზოგჯერ მხოლოდ საშენო,
სხვის დარდებს ზედ ნუ გადააკვდები!
იქნებ ცხოვრებას თავი აჩვენო,
რომ არც მეტი ხარ და არც ნაკლები!
ზოგჯერ შეცდომაც  უნდა დაუშვა,
ვარდნა აფრენას ზურგს უვარჯიშებს!
მერე რა მოხდა, ისე, დაუშვათ,
თუ კი წინასწარ არ თვლი ნაბიჯებს...
სხვა ხომ სხვის ომში მუდამ ბრძენია,
თვითონ იპოვე გამოსავალი!
შენი ცხოვრება მხოლოდ შენია,
არ შეგეშინდეს, როცა წავალ მე!
ისე მზრუნველი, როგორც შენა ხარ,
დღეს იშვიათად ვინმე რომ შეგხვდეს.
ისწავლე მიზნის გულში შენახვა
და ოცნებებიც ახდება ერთხელ!
პ.ს.
დროს ნუ გაფლანგავ,
დრო არ გპატიობს!
შენც დაემგზავრე დროის დინებას!
მაუწყებლობდა ხაზის რადიო,
დედის თხოვნით თუ გამოცდილებით!