ვერ დავივიწყებ ვერასდროს
ხაფანგებს მტრისგან დაგებულს,
ვერც საფლავებს და სალოცავს,
მტარვალის გაჩანაგებულს,
ვერც სისხლის სადღეგრძელოებს
პაპაჩემისგან გაგებულს,
თვალშეუდგამი კლდის წვერზე
ციხეს ქვითკირით აგებულს,
ვერც მოელვარე ძველ გორდას,
ჩვენგან ქარქაშში ჩაგებულს,
ვერც დამარცხების სიმწარეს
და ომებს ჩვენგან წაგებულს,
ვერც მეგობრების სიცოცხლეს
სამშობლოსათვის გაღებულს,
...სიმშვიდეს მაშინ ვიპოვი,
მათ სისხლს თუ ვნახავ აღებულს!