მოდი დავიმატოთ ერთმანეთი
სიებში და წონებში,
დავთვალოთ ერთმანეთის კონტაქტები ბუნებასთან
და ვიეჭვიანოთ ყველა გაპრანჭულ ნაძვზე.
გავუგზავნოთ ღიმილები მზეს,
ქოლგები წვიმას,
ყავარჯნები სეტყვას
იქნებდა დასჭირდეთ.

დავემალოთ ერთმანეთს სივრცეებში,
ავეფაროთ უცხო პირებს ჩვენს შორის,
გავუგზავნოთ ყვავილები პარაშუტისტს,
იქნებ-და დასჭირდეს.
იქნებ უღალატოს გულმა ცაში,
ვერ გაუძლოს ადრენალინის მოზღვავებას,
იქნებ გულმა ვერ დაიტიოს ბედნიერება,
როცა ყველაფერი ხელისგულზე გიდევს,
როცა მეფე ხარ
და
იქნებ ჩამოსვლაც აღარ მოუნდეს,
დარჩეს გული ცაში...
დასჭირდება, დასჭირდება
ყვავილები...
ჩვენ ხომ უნდა გავაცილოთ
ეს ტრადიციაა
შევაგდოთ "რაფი"-ს, "უაზი"-ს ან უკეთეს შემთხვევაში
რომელიმე იმპორტული მანქანის "კუზაოზე",
გავმართოთ "ვირთხების რბოლა" სოროებისკენ...

ს ო რ ო ე ბ ი ს კ ე ნ
ყვავილებით....