( მე ვიცოდი რომ შენ დაიღუპებოდი)


ძუძუმ ხვატიან სიმწიფეთა რწევით მოხიბლა,
ამძუვნებული კეთროვნების ხვადი სხეული,
რიცხვებად, გველთა დაძაგრული, მრუმე ხორხიდან,
დარღვეულ ღვიძლზე მამრისაგან შემონთხეული.
მოშხივის შანკრის აცოფებულ რტოებში წალა
და სთესლავს ყვრიმალს, ათაშანგის თვალი დათხრილი,
თეძოთა ფერვა ციანოზად ამოიძალა,
ადრე ვარდობის გადამხეთქავ შტორმად დახლილი.
გაღრჩობს ჩირქობის დასიცხული, ჩქარი ზვირთები,
უდაბნოს ლამში გეხალება ფილტვი გაცრილი,
რძეებად გხვრეპენ უსტომაქო, ზღვა ჰელმინთები,
ჰემატურიულ სისხლებისგან ქონით დასვრილი.
გიძაბუნდება ამორძალის ძარღვი გრძნეული,
მარად ნერვიულ დაურვების ცვარმოდინარი....
დუღს ემბრიონი ლორწოვნებში ამორწეული
და ბნელი საშო, თვით სიკვდილის სალოგინარი.