დაბრუნდები

ჩვენი ცხოვრება გაჩერდა კადრში
მზემ გადიფარა საბნად ღრუბლები
შენ შეგიძლია დამშორდე  ცხადში
მაგრამ სიზმრებში ჩემთან ბრუნდები

ათასი დღე და ათასი ღამე
შენზე ფიქრებს და  დარდებს ვუნდები
თუ გინდ ათასჯერ წახვიდე სადმე
ათასივეჯერ დამიბრუნდები

იმედის სხივით მზე მოსჩანს ზღვაზე
მეც მის ცქერაში უხმოდ ვდუმდები
შენ შეიძლება გამცვალო სხვაზე
მაგრამ ვიცი რომ დამიბრუნდები

რომ შეიცვალოს მთელი სამყარო
ვფიქრობ და ბოლოს მაინც ვრწმუნდები
ჩემი ლექსები რომც გადაყარო
მჯერა რომ მაინც დამიბრუნდები

როდესაც მთვარეს ავხედავ ღამით
მოგონებებით ძლიერ ვდუნდები
სიცოცხლე დამრჩეს სულ ორი წამით?
ბოლო წამს მაინც დამიბრუნდები

ღვთისმშობლის სახის გამომსახველი
მახათას მთები გრძნობით დავძარი
შენ დაგაბრუნებს  ჩვენი სახელის
ქვაზე  ნაშენი წმინდა ტაძარი


        აღარ მინდა

გულმა ძგერა შეაჩერა
დადუმდა და გაირინდა.
გარეთ გასვლა აღარ მსურს და
აღარც სახლში ყოფნა მინდა.

ცამ მინდორი დანამა და
ბალახები აბიბინდა.
არც ქალაქში ყოფნა მსურს და
არც სოფელში წასვლა მინდა.

მზემ ღრუბლები გადიფარა
გაიელვა და გაწვიმდა.
არ მსურს შენი დავიწყება
აღარც შენზე ფიქრი მინდა.

სიცხისაგან საფეთქლები
ადუღდა და აშიშხინდა.
კვლავ დათრობა აღარა მსურს
აღარც ფხიზლად ყოფნა მინდა.

შემოდგომის მერცხალივით
სითბო გულიდან გაფრინდა.
აღარც შენი ნახვა მსურს და
არც უშენოდ ყოფნა  მინდა.