იმერეთში  არის სოფელი პატარა გოგნი.

გოგნის მთაზე მდებარე წმიდა გიორგის სახელობის  სალოცავი VII-VIII საუკუნეების ძეგლს წარმოადგენს და მას "კარუგდებელის" სახელით მოიხსენიებენ.
წმიდა გიორგის სახელობის ეკლესიის  სახელწოდება შემთხვევითი არაა.
  ლეგენდის მიხედვით, სოფელში ერთი დავრდომილი მოხუცი ცხოვრობდა, რომელსაც წმიდა გიორგი გამოეცხადა.
წმინდანმა მას უთხრა, რომ მოფრინდებოდა ჩიტი, რომელიც ერთ-ერთი ქვისაკენ გაუძღვებოდა. დავრდომილი მართლაც წამოდგა და გაჰყვა ჩიტს, რომელმაც ეს ქვა აპოვნინა. მოხუცმა ქვა იმ ადგილზე მიიტანა, სადაც ჩიტი დაიღუპა. სწორედ ამ ადგილზე ააშენეს სალოცავი.

  სალოცავს კარი ჰქონდა, რომელიც მუდამ ჩამოგდებული ხვდებოდათ.  დაუდარაჯდნენ სოფლის მაცხოვრებელნი  და ნახეს, რომ შუაღამისას კარი თავისით ვარდებოდა. ამიტომაც უწოდეს "კარუგდებელი".

შემდეგ სალოცავი დაანგრიეს და ქვები კლდეზე გადაყარეს.

მოგვიანებით სოფლის ხუთმა მკვიდრმა ქვები კლდიდან ამოიტანა და ახალი, ოდნავ უფრო დიდი სალოცავი ააშენა.
როცა წმიდა ადგილს მონადირე უახლოვდებოდა, იარაღს რამდენიმე მეტრით ქვემოთ ტოვებდა და ახლომახლო ტერიტორიაზე  ნადირს არასოდეს კლავდა.

    გიორგობის აღსანიშნად მორწმუნეები წინა ღამით იწყებენ სალოცავზე ასვლას. დღის განმავლობაში სხვადასხვა რაიონიდან მომლოცველთა ნაკადი არ წყდება. ყოველ 6 მაისს წმიდა ადგილს ათიათასობით მორწმუნე სტუმრობს.
ბევრ მათგანს წმიდანის სახელზე შესაწირი მოჰყავს.