ჩემი სიზმრები მოდიან ჩემთან
მოურიდებლად აღებენ საკეტს
დადიან სახლში. კედლისკენ სარკეს
ატრიალებენ. ფეხებმოკეცილ
სკამზე სხდებიან. მეუბნებიან:
სული მოგვეცი.

მოგონებები მოდიან ჩემთან
მოდიან შუქის მწერების გუნდად
საქაღალდეებს, წარწერით „საქმე
№ X“  მიდებენ ცხვირწინ
ძველ ადგილებზე აწყობენ საგნებს
სანაცვლოდ ჩემი დღეები უნდათ.

და ოცნებებიც მოდიან ჩემთან
ის რამდენიმე, რომელთაც ვადა
ჯერ არ გასვლია. არაფერს ცვლიან
არაფერს მთხოვენ. დგებიან კართან.
და როგროც რამე უაზრო სურათს,
ჩემს ჩრდილს კედლიდან ვიღებ და ვატან.

და როცა ჩემგან დარჩება მხოლოდ
მხოლოდ რაც სხვებში დარჩება ჩემგან
უცხო სიზმრებში
უცხო ოთახში,
უცხო უჯრებში
დავიწყებ ქექვას
რომ შევაგროვო ჩემივე თავი