* * *
თებერვალი მარტის მარყუჟში შეიყუჟა.
აპრილი მოსვლას ძველებურად აგვიანებს.
სულერთია, დღეთა ნამარტალობა უცილოა.
* * *
მაისმა მიმქრალი ვულკანივით ამოხეთქა.
კალმახებს მსუყე მუცლები ამოუთბო.
შავი არაგვი ოქროსფრად ალიცლიცდა.
* * *
ივნისმა გუბეები უმოწყალოდ დააშრო.
მზიანმა დღეებმა ღამეები გადაათეთრეს.
ჰაერი ზაფხულის სუნით დამძიმდა.
* * *
ივლისმა და აგვისტომ პირი შეკრეს.
უვადო ზავი სიმშრალის მანიფესტია.
თავხედმა ზაფხულმა სექტემბერიც გადაიბირა.
* * *
ორსულმა ოქტომბერმა ნოემბერი შვა.
დეკემბერმა მორიგი წელი მიითვალა.
იანვრის სუსხმა სიმთვრალეში გამომაფხიზლა.
* * *
თებერვალი მარტის მარყუჟში შეიყუჟა...