შემოდგომა

წითელი, ყვითელი ფოთლები...
სიცივე შევაპარე ნიავს.
მწვანე ბალახიდან ვორთქლდები,
ჰაერშიც შევპარულვარ ნისლად.
ჩიტებს თბილ ქვეყნისკენ ვაცილებ,
არ მინდა, რომ მოუსწროთ ყინვამ.
ბუნაგი მზადაა საძილედ,
დათვებო,დაიძინეთ მშვიდად.
წითელი, ყვითელი ფოთლებით
საბანი შევუკერე მიწას,
კაკლით და თხილით და რკოებით
ფუღურო გადაავსო ციყვმაც.
ხეებზე სიშიშვლე შენიშნეს.
როგორ, თუ ყველაფერი უჩანთ!
ცა ბრაზობს, გრუხუნებს, ვერ ითმენს
სირცხვილი ჩამორეცხოს უნდა.
ავდარი სოკოს არ ადარდებს.
ახურავს ქოლგასავით ქუდი.
ნაძვებმა სიმწვანე არ დათმეს,
სხვა ფერის არ გვინდაო ქურქი.
სიმწიფის სიტკბოსთან შერევით
ბუნებას უნდოდა, რომ ეთქვა,
წითელი, ყვითელი ფერებით
ხეხილზე შემოდგომა ფეთქავს.